AQSHda ayol ChatGPT yordami orqali lotereyada 150 ming dollar yutib oldi

AQSHning Virjiniya shtatidagi Midlotian shahrida yashovchi Kerri Edvards 2025-yil 8-sentyabr kuni Virginia Lottery Powerball lotereyasida 150 ming dollar yutib oldi. U raqamlarni tanlashda ChatGPT maslahatlaridan foydalangan. Sun'iy intellekt unga g‘alaba va’da qilmagan, balki tasodifiy raqamlar kombinatsiyasini taklif qilgan, ammo aynan o‘sha raqamlar yutuqli chiqqan.

Kerri chiptani onlayn xarid qilgan. Dastlabki sovrin 50 ming dollar bo‘lsa-da, Power Play (g‘alaba summasini bir necha baravar ko‘paytirish funksiyasi) natijasida yutuq uch baravar ko‘payib, 150 ming dollarga yetgan.

Yutuq haqida bildirishnoma kelganda ayol dastlab buni firibgarlik deb o‘ylagan, keyinchalik sovrinni qo‘lga olganida, pulning hammasini xayriya yo‘liga bag‘ishlashini ma’lum qilgan:

 

“Bu kutilmagan ne’mat menga nasib qilgan zahoti, uni nima qilishim kerakligini aniq bildim. Men hayotda kerakli barcha narsaga egaman, shuning uchun boshqalarga yordam berishni lozim topdim”, dedi u.

Kerri Edvards pulni uch qismga bo‘lib quyidagi tashkilotlarga xayriya qiladi:

AFTD (Association for Frontotemporal Degeneration) — frontotemporal degeneratsiya kasalligini o‘rganishga mablag‘ ajratadigan tashkilot. Edvards o‘tgan yili demensiyadan vafot etgan turmush o‘rtog‘i xotirasiga bag‘ishlab pul o‘tkazadi.

Shalom Farms — Richmond shahrida oziq-ovqat adolati va hamjamiyatda sog‘lom taom ta’minoti bilan shug‘ullanuvchi notijorat tashkilot.

Navy-Marine Corps Relief Society — harbiy xizmatchilar va ularning oilalarini qo‘llab-quvvatlaydigan jamg‘arma. Edvardsning otasi harbiy uchuvchi bo‘lgani sababli Kerri bu tashkilotga ham pul o‘tkazishni istadi.